Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.40 | Dem. 18.42 (English) | >>Dem. 18.45 |
18.41ὁ δὲ ταύτης τῆς πίστεως αὐτῷ συνεργὸς καὶ συναγωνιστὴς καὶ ὁ δεῦρʼ ἀπαγγείλας τὰ ψευδῆ καὶ φενακίσας ὑμᾶς , οὗτός ἐσθʼ ὁ τὰ Θηβαίων ὀδυρόμενος νῦν πάθη καὶ διεξιὼν ὡς οἰκτρά , καὶ τούτων καὶ τῶν ἐν Φωκεῦσι κακῶν καὶ ὅσʼ ἄλλα πεπόνθασιν οἱ Ἕλληνες ἁπάντων αὐτὸς ὢν αἴτιος . δῆλον γὰρ ὅτι σὺ μὲν ἀλγεῖς ἐπὶ τοῖς συμβεβηκόσιν , Αἰσχίνη , καὶ τοὺς Θηβαίους ἐλεεῖς , κτήματʼ ἔχων ἐν τῇ Βοιωτίᾳ καὶ γεωργῶν τὰ ἐκείνων , ἐγὼ δὲ χαίρω , ὃς εὐθὺς ἐξῃτούμην ὑπὸ τοῦ ταῦτα πράξαντος .
ἀλλὰ γὰρ ἐμπέπτωκʼ εἰς λόγους , οὓς αὐτίκα μᾶλλον ἴσως ἁρμόσει λέγειν . ἐπάνειμι δὴ πάλιν ἐπὶ τὰς ἀποδείξεις , ὡς τὰ τούτων ἀδικήματα τῶν νυνὶ παρόντων πραγμάτων γέγονʼ αἴτια .
οἱ μὲν κατάπτυστοι Θετταλοὶ καὶ ἀναίσθητοι Θηβαῖοι φίλον , εὐεργέτην , σωτῆρα τὸν Φίλιππον ἡγοῦντο · πάντʼ ἐκεῖνος ἦν αὐτοῖς · οὐδὲ φωνὴν ἤκουον εἴ τις ἄλλο τι βούλοιτο λέγειν . ὑμεῖς δʼ ὑφορώμενοι τὰ πεπραγμένα καὶ δυσχεραίνοντες ἤγετε τὴν εἰρήνην ὅμως · οὐ γὰρ ἦν ὅ τι ἂν ἐποιεῖτε . καὶ οἱ ἄλλοι δʼ Ἕλληνες , ὁμοίως ὑμῖν πεφενακισμένοι καὶ διημαρτηκότες ὧν ἤλπισαν , ἦγον τὴν εἰρήνην ἄσμενοι , καὶ αὐτοὶ τρόπον τινʼ ἐκ πολλοῦ πολεμούμενοι .
18.42
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.40 | Dem. 18.42 (English) | >>Dem. 18.45 |